बलात्कार आरोप लागेका कलाकार पल शाह (पूर्णविक्रम शाह)को तर्फबाट तनहुँ जिल्ला अदालतमा थुनछेक बहस सुरु भएको छ। एक नाबालिग गायिकालाई बलात्कार गरेको आरोपमा शाहविरुद्ध मुद्दा दर्ता भएको थियो। बुधबार सरकारी वकिल र जाहेरवालाको तर्फबाट १० जना कानुन व्यवसायीले बहस गरेका थिए।
बिहीबार शाहको तर्फबाट पनि १० जना कानुन व्यवसायीले बहस गर्नेछन्। उनीहरूको बहस सकिएपछि सरकारी वकिलको तर्फबाट जवाफी बहस हुनेछ। थुनछेक बहस सकिएपछि अदालतले आजै आदेश जारी गर्ने छ। मुद्दाको पुर्पक्षका लागि बलात्कार आरोपी शाह र मतियारको आरोप लागेका उनका म्यानेजर कृष्ण जोशीलाई तारेखमा राख्ने, धरौटी मागेर तारेखमा राख्ने वा थुनामा पठाउने भन्ने आदेश हुनेछ।
