शहीद स्मारक ए डिभिजन लिग फुटबल प्रतियोगिता अन्तर्गत आइतबार भएको खेलमा जावलाखेल युथ क्लबले हिमालयन शेर्पा क्लबलाई पराजित गरेको छ ।
त्रिपुरेश्वरस्थित दशरथ रङ्गशालामा आज भएको खेलमा जावलाखेलले हिमालयनलाई २–१ गोल अन्तरले पराजित गरेको हो । जावलाखेलको जितमा रुपबहादुर लामा र ओन्गुना जुनियरले एक/एक गोल गरे ।
यता हिमालयन शेर्पाका तर्फबाट अमृत श्रेष्ठले एक गोल फर्काए । खेलको १५औँ मिनेटमा रुपबाहदुरले पहिलो गोल गर्दै जावलाखेललाई सुरुवाति अग्रता दिलाएका थिए । तर, ७१औँ मिनेटमा हिमालयनका खेलाडी अमृतले गोल गर्दै खेललाई १–१ गोलको बराबरीमा ल्याए ।
खेलको ८८औँ मिनेटमा ओन्गुनाले गोल गर्दै जावलाखेललाई २–१ को जित दिलाए । यो जितसँगै जावलाखेल रेलिगेसन जोनबाट जोगिएको छ । जावलाखेल १२ खेलमा १४ अङ्क जोडदै अङ्क तालिकाको दशौँ स्थानमा उक्लेको छ । समान १२ खेल खेलेको हिमालयनले १३ अङ्क जोडेको छ ।
