कोभिड–१९ को नयाँ भेरियन्ट ओमिक्रोनको संक्रमण बढेपछि स्थगित गरिएको त्रिभुवन विश्वविद्यालयका परीक्षाहरू आउँदो फागुनमा हुन सक्ने बताइएको छ । यसबारेमा यसै साता त्रिविको परीक्षा नियन्त्रण कार्यालयले सूचना जारी गर्ने बताइएको छ ।
स्थगित परीक्षाबारे त्रिविले सोमबार अनौपचारिक छलफल गरेको परीक्षा नियन्त्रक पुष्पराज जोशीले जानकारी दिए । त्रिविका पदाधिकारी, विद्यार्थी संगठन र प्राध्यापकहरूसँग अनौपचारिक बैठक बसी भइरहेका घटनाक्रमबारे जानकारी लिएको उनले बताए । उनी भन्छन्, “कोरोनाको संक्रमणलाई अनुगमन गरिरहेका छौ। विद्यार्थी तथा प्राध्यापकहरूसँग पनि छलफल चलाएका छौँ । यसै साता सूचना जारी गर्छौँ ।”
उनले कोभिड–१९ को प्रकोपबारे बुझ्न तराईतिरका जिल्लामा समेत भ्रमण गर्न गएको बताए । “तराईमा कोरोनाको त्रास खासै भेटिएन । अब आज र भोलिको कोरोनाको संक्रमण अध्ययन गर्छौँ,” उनले भने । उनले परीक्षाअगावै १५ दिनअगाडि सूचना जारी गर्ने स्पष्ट पारे । त्रिविले स्थगित सबै परीक्षाको पुनर्तालिका सार्वजनिक गरेर सञ्चालन गरिने जनाएको छ ।
