स्वेच्छिक अवकाश रोज्ने शिक्षकलाई एक लाख भत्ता, इसीडी शिक्षकले पाए भने जति तलब

  • प्रकाशित मिति : २०७८ पुष २९, बिहीबार
  • chhanbin.com

स्वेच्छिक अवकाश रोज्ने शिक्षकलाई तानसेन नगरपालिकाले एक लाख रुपैयाँ प्रोत्साहन भत्ता प्रदान गर्न थालेको छ।

शिक्षक दरबन्दी मिलानमा समस्या देखिएपछि नगरपालिकाले प्रावि तहका १० शिक्षकलाई प्रोत्साहन सुविधा प्रदान गर्न थालेको हो। राजीनामा स्वीकृत भएपछि अवकाश गर्ने शिक्षकले एक लाख प्रोत्साहन भत्ता पाउने भएको नगरपालिकाले जनाएको छ। यसैबीच, विद्यालयका सहयोगी, सहायक कर्मचारी, बालविकास सहजकर्ता र सामुदायिक सिकाइ केन्द्रमा कार्यरत परिचालकको न्यूनतम पाश्रिमिक मासिक १५ हजार उपलब्ध गराउन थालिएको नगर प्रमुख अशोककुमार शाहीले बताए।

यसअघि बालविकास सहजकर्ताको पारिश्रमिक ६ हजार ५०० रहेको थियो। न्यूनतम पारिश्रमिकमा दिनभर ससाना बालबालिकालाई पठनपाठन गराउनुपर्ने बाध्यता रहेको थियो। बालविकास सहजकर्ताको तलब पुनरावलोकन समितिको गत कात्तिक १५ गतेको बैठकको निर्णयअनुसार नगरपालिकाले पारिश्रमिक बढाएको हो। अहिले त्यहाँ तोके अनुरुपकै तलब दिन थालिएको छ।

नगरपालिकाले ९४ लाख ५१ हजार थप गर्ने निर्णय गरेको हो। नपुग रकम कार्यालय सञ्चालन तथा प्रशासनिक खर्चबाट भुक्तानी गर्ने निर्णय गरिएको नगरपालिकाले जनाएको छ। नगरपालिकाभित्र सहयोगी, सहायक कर्मचारी, बालविकास सहजकर्ता र सामुदायिक सिकाइ केन्द्रमा कार्यरत परिचालक ११८ र बालविकास सहजकर्ता ४६ जना रहेका छन्। आर्थिक वर्ष २०७७/०७८ मा कर्मचारी तथा बालविकास सहजकर्ताका लागि वार्षिक एक करोड १८ लाख बराबर खर्च भएको थियो।