गृह जिल्ला पुगेर रामचन्द्र पौडेलले पार्टीमा अन्तरघातलाई प्रश्रय दिन नहुने बताए

  • प्रकाशित मिति : २०७८ पुष २९, बिहीबार
  • chhanbin.com

नेपाली कांग्रेसका वरिष्ठ नेता रामचन्द्र पौडेलले पार्टीमा अन्तरघातलाई प्रश्रय दिन नहुने बताएका छन्। कांग्रेस तनहुँ क्षेत्र नं १ ले बुधबार डुम्रेमा आयोजना गरेको पदस्थापन कार्यक्रमलाई सम्बोधन गर्दै नेता पौडेलले पार्टीको १४औं महाधिवेशन सम्पन्न भएर नयाँ नेतृत्व आइसकेकाले अब एकजुट भएर अगाडि बढ्नुको विकल्प नभएको बताएका हुन्।

‘पार्टीको अधिवेशन सकिएको छ, हिजो जे जसरी चुनाव लडे पनि त्यो आन्तरिक चुनाव थियो, चुनावलाई लिएर अन्तरघातलाई प्रश्रय दिनुहुँदैन,’ उनले भने, ‘कांग्रेस एकढिक्का भएर आगामी आम निर्वाचनमा जानुपर्छ।’ वरिष्ठ नेता पौडेलले विगतका तीतामीठा अनुभवलाई बिर्सिएर एकजुट भएर प्रतिपक्षसँग लड्नुको विकल्प नभएको बताए।

आफूले कहिल्यै पनि पदका लागि आन्दोलन नगरेको उल्लेख गर्दै नेता पौडेलले भने, ‘केपी ओलीविरुद्धको आन्दोलनको नेतृत्व गर्दै गर्दा मलाई प्रचण्डले राष्ट्रपति दिने भयो भनेर पनि अफवाह फैलाए, म पदका लागि आन्दोलन गर्ने मान्छे होइन।’ जीवन रहेसम्म जनताको सेवामा लागिरहने प्रतिबद्धतासमेत वरिष्ठ नेता पौडेलले व्यक्त गरे। कार्यक्रममा केन्द्रीय सदस्य शङ्कर भण्डारी, गोविन्द भट्टराई लगायतले कांग्रेस एकढिक्का हुनुको विकल्प नभएको बताएका थिए।