सुदूरपश्चिमबाट कांग्रेस हाँक्न १७ जना निर्वाचित भए, कुन जिल्ला बाट को ?

  • प्रकाशित मिति : २०७८ पुष ८, बिहीबार
  • chhanbin.com

नेपाली काँग्रेसको १४ औं महाधिवेशनमा सुदूरपश्चिमबाट काँग्रेस सभापति, सहमहामन्त्रीदेखि केन्द्रीय सदस्य गरी १७ जना निर्वाचित भएका छन् । १४ औं महाधिवेशनबाट काँग्रेस सभापतिमा डडेल्धुराका शेरबहादुर देउवा निर्वाचित भएका छन् । देउवा काँग्रेस सभापतिमा दोस्रोपटक निर्वाचित भएका हुन् । सहमहामन्त्रीमा बाजुराका बद्री पाण्डे विजयी भएका छन् । उनी यसअघि केन्द्रीय सदस्य थिए ।

खुला केन्द्रीय सदस्यमा कञ्चनपुरका एनपी साउद र रमेश लेखक, डडेल्धुराका नैनसिंह महर तथा दार्चुलाका दिलेन्द्रप्रसाद बडू विजयी भएका छन् । महिला केन्द्रीय सदस्यतर्फ डडेलधुराकी आरजु राणा देउवा तथा कैलालीबाट ईश्वरी न्यौपाने विजयी भएका छन् । भूगोलतर्फ कैलालीका डा.रणबहादुर रावल, कञ्चनपुरका यज्ञराज जोशी, कैलालीकी सुशीला मिश्र भट्ट विजयी भएका छन् ।

दलित खुलातर्फ कैलालीका नृपबहादुर वड र बझाङका प्रकाश स्नेही रसाइली विजयी भएका छन् । थारु खुलातर्फ कैलालीका रामजनम चौधरी र जीवन राना, पिछडिएको क्षेत्रबाट बझाङका अर्जुन जंगबहादुर सिंह तथा खस आर्यतर्फ अछामका गोविन्दबहादुर शाह विजयी भएका छन् ।

जिल्लागत रूपमा हेर्दा डडेलधुराबाट सभापतिसहित तीनजना, बाजुराबाट एक सहमहामन्त्री, कैलालीका ६ जना केन्द्रीय सदस्य, कञ्चनपुरका तीनजना केन्द्रीय सदस्य, बझाङबाट दुईजना केन्द्रीय सदस्य तथा अछाम र दार्चुलाका एक-एकजना केन्द्रीय सदस्यमा विजयी भएका छन् । बैतडीबाट केन्द्रीय सदस्य निर्वाचित भएका छैनन् ।

विजयी १७ मध्ये संस्थापन पक्षबाट १४ तथा इतर समूहबाट तीनजना विजयी भएका छन् । काँग्रेस सहमहामन्त्रीमा विजयी भएका बद्री पाण्डे, केन्द्रीय सदस्य दिलेन्द्र बडू र बझाङका प्रकाश स्नेही रसाइली इतर समूहका हुन् ।