दर्तै हुँदैन तपाईंहरूको महाअभियोग भन्दै ओली हाँसे फिस्स, गुहार माग्न गएका वकिल परे हिस्स

  • प्रकाशित मिति : २०७८ मंसिर २१, मंगलवार
  • chhanbin.com

प्रधानन्यायाधीश चोलेन्द्र शमसेर जबरालाई महाअभियोग लगाउन गुहार माग्दै ओली निवास बालकोट पुगेका वकिललाई ओलीले उल्टै झपारेका छन्। नेकपा एमालेका अध्यक्ष समेत रहेका प्रमुख विपक्षी दलका नेता केपी शर्मा ओलीले प्रधानन्यायाधीश जबराविरुद्ध महाअभियोग नै दर्ता हुन नसक्ने बताएका छन् ।

महाअभियोगमा सहयोगको याचना गर्दै बालकोट पुगेका बार पदाधिकारी तथा वरिष्ठ अधिवक्ताहरूसँग ओलीले परमादेशमा सेटिङ गर्नेहरूकै कुरा बाझिएको बताए । परमादेश माग गर्ने बार र वरिष्ठ अधिवक्ता महाअभियोगको पक्षमा रहे पनि सत्ता गठबन्धन विपक्षमा रहेको ओलीको भनाइ थियो ।

ओलीले भने, ‘प्रधानमन्त्री शेरबहादुर देउवाले भनेको सुन्नु भएन ? गजेन्द्र हमाल कांग्रेसको कोटाबाट मन्त्री भएका हुन् । अर्को नेता (प्रचण्ड) ले उहाँ त कांग्रेसको कोटाबाट हो चोलेन्द्रको कोटा होइन भन्नुभयो । लेनदेन भएकै होइन भनिरहेको छ भने महाअभियोग कसरी दर्ता हुन्छ ? दर्तै हुँदैन तपाईंहरूको महाअभियोग ।’

अहिलेको समस्या पाँच दलीय सत्ता गठबन्धनले अदालतमा सेटिङ मिलाएका कारण उत्पन्न भएको र यसबाट सबै पाँचैजना न्यायाधीश संलग्न रहेको बताउँदै ओलीले हिजो परमादेश दिलाउने वकिलहरूप्रति आफ्नो पूर्वाग्रह नरहेको प्रष्ट पारे । ओलीको भनाई सुनेपच्ची वकिलहरू मलिन अनुहार पारेर त्यहाँ बाट निस्किएको बालकोट श्रोतले बतायो।