धनगढी पुगेर प्रचण्डले भने – २९ भदौ २०७४ मा भएको एमसिसी सम्झौता संसद बाटै पारित गरिन्छ

  • प्रकाशित मिति : २०७८ मंसिर ८, बुधबार
  • chhanbin.com

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले सुरुकै सम्झौता बमोजिमको एमसिसी पारित गर्नुपर्ने बताएका छन्। पार्टीको कार्यक्रममा सहभागी हुन आज धनगढी पुगेका प्रचण्डले सुरुमा गरिएको एमसिसी सम्झौतालाई पारित गर्नुपर्ने बताएका हुन्।

आफू प्रधानमन्त्री हुँदा २९ भदौ २०७४ मा अमेरिकामा नेपालका तर्फबाट तत्कालीन अर्थमन्त्री तथा कांग्रेस नेता ज्ञानेन्द्रबहादुर कार्कीले र एमसिसीका तर्फबाट कार्यवाहक सिइओ जोनाथन नाशबीच भएको एमसिसीको सम्झौता नै पारित गर्नुपर्ने प्रचण्डले बताएका हुन्।

‘सुरुमा संसदबाट पारित गर्नुपर्ने गरी एमसिसी सम्झौता भएको थिएन’, प्रचण्डले भने, ‘पछि ओली सरकारले त्यसलाई परिमार्जित गरेर संसदबाट पास गर्नुपर्ने नीति ल्याएपछि विवाद बढेको छ, त्यसैले सुरुको सम्झौतामा फर्केर पास गर्नुपर्छ।’

अमेरिकी सहयोग नेपालले लिँदै आएको र एमसिसी पनि स्वीकार्नु पर्ने बताएका उनले अमेरिकी सहयोग नलिने नेपालको नीति नरहेको स्पष्ट पारे। अमेरिकासँग ७५ वर्षदेखि सम्बन्ध रहेको र त्यसबीचमा सबै सहयोग नेपालले लिँदै आएको स्मरण गराउँदै प्रचण्डले एमसिसी पनि स्वीकारेर सदनबाट पारित गर्नुपर्ने बताएका हुन्।

‘तर, संसदबाट पारित गर्ने भन्दै ओली नेतृत्वको सरकारले एमसिसीका केही जटिल बुँदा थपेको छ। सुरूको सम्झौता विवादित थिएन। त्यसैले सुरुवाती सम्झौतामा फर्केर सो योजना पास गर्नुपर्दछ’, उनले भने।