नेकपा एमालेका अध्यक्ष केपी शर्मा ओलीले मंगलबार (आज) सम्पादकहरुसँग अन्तरक्रिया गर्दैछन् । एमाले अध्यक्ष ओलीले आज महाधिवेशन केन्द्रित रहेर सम्पादकहरुसँग अन्तरक्रिया गर्ने एमालेका नेता सुर्य थापाले जानकारी दिए ।
उनका अनुसार अध्यक्ष ओलीले आज दिउँसो २ बजे सम्पादकहरुसँग अन्तरक्रिया गर्ने भएका हुन् । यस्तै एमालेको स्थायी कमिटी बैठक आज बिहान ११ बजे बस्ने एमाले पार्टी कार्यालय सचिव शेरबहादुर तामाङले जानकारी दिए ।
एमालेले सोमबार स्थायी कमिटी बोलाएको थियो । तर नेताहरुको कार्यव्यस्तता भन्दै बैठक अन्तिम समयमा आएर स्थगित भएको थियो ।
एमालेको १०औँ महाधिवेशनको तीन दिन अघि स्थायी कमिटी बस्न लागेको हो । बैठकले महाधिवेशन प्रतिनिधि मनोनयन गर्ने नेता तामाङले जानकारी दिए । एमाले महाधिवेशन १०–१२ मंसिरमा चितवनमा हुँदैछ ।
विधानअनुसार कुल महाधिवेशन प्रतिनिधिको पाँच प्रतिशत मनोनित गर्न सकिने व्यवस्था छ । यसरी करिब एक सयको हाराहारीमा महाधिवेशन प्रतिनिधि मनोनित हुनेछन् । नेता तामाङका अनुसार बैठकमा महाधिवेशनको तयारी र व्यवस्थापकीय कामबारे छलफल हुनेछ ।
