सांसदको खडेरी परेपछि देउवा सरकारका तीन राजदूतको सुनुवाई हुनै सकेन, कता गए सांसद ?

  • प्रकाशित मिति : २०७८ मंसिर ५, आईतवार
  • chhanbin.com

केही सांसद अनुपस्थित भएपछि संसदीय सुनुवाई समितिमा भारत, बेलायत र अमेरिकाका लागि प्रस्तावित राजदूतहरूको सुनुवाइ प्रभावित भएको छ ।

संसदीय सुनुवाइ समितिको बैठकका लागि कोरम नपुगेपछि सुनुवाइ प्रभावित भएको हो । आइतबार ११ बजेका लागि समितिको बैठक बोलाइएको थियो । १५ सदस्यीय समितिमा चारजना मन्त्री भएका कारण सदस्य नरहेपछि हाल समिति ११ सदस्यीय छ ।

त्यसमध्ये कोरम पुग्न कम्तिमा ६ जना चाहिन्थ्यो । तर आइतबारको बैठकमा एमालेका सुरेन्द्र पाण्डे, निरुदेवी पाल, माओवादीका अमृता थापा, देव गुरुङ र समिति सभापति समेत रहेका लोसपाका लक्ष्मणलाल कर्ण मात्र उपस्थित भए । समितिका सभापति कर्णले पार्टीहरूको महाधिवेशन चलिरहेकाले आउँछु भनेकाहरू पनि नआएपछि कोरम नपुगेर बैठक स्थगित भएको जानकारी दिए ।

आइतबारको बैठकमा कांग्रेसका जितेन्द्र देव पुष्पा भुसाल, भिनसेनदास, नेकपा एसकी नन्दा चपाई, माओवादीका पूर्णकुमारी सुवेदी, शिवकुमार मण्डल र एमालेका सुमनराज प्याकुरेल बैठकमा आएनन् । सुनुवाइका लागि प्रस्तावित राजदूत शंकर शर्मा र ज्ञानचन्द्र आचार्य समयमै समिति बैठकमा आइपुगेका थिए । श्रीधर खत्री बाटोमा आउँदा आउँदै बैठक स्थगित भएको थियो । अब सुनुवाइ लागि आउँदो १७ गतेका लागि बैठक बोलाइएको छ ।