बेवारिसे भएपछि प्रहरीले आश्रम पुर्याएकी अस्मिता बनिन् मिस टिन क्विन, के छन् उनका चाहना ?

  • प्रकाशित मिति : २०७८ कार्तिक २७, शनिबार
  • chhanbin.com

हालै सम्पन्न मिस टिन क्विन (सिजन २) २०२१ कि विजेता बनिन्, अस्मिता अधिकारी । सामाखुसीस्थित लिंकन कलेजमा प्लस टु अध्ययनरत अधिकारीले २७ जना प्रतिस्पर्धीलाई पछि पार्दै विजेता बन्न सफल भइन् ।

उनले पहिलो पुरस्कार स्वरुप एक लाख नगद रुपैयाँ हात पारेकी छन् । यस्तै आयोजकका अनुसार उनलाई पोखरा, दक्षिण कोरिया टुर, फोटो सुट, म्युजिक भिडिओमा खेल्ने अवसर प्रदान गरिने छ । काठमाडौँ कि अधिकारीलाई पवित्र समाज सेवा नेपालले संरक्षण दिएर हुर्काउने, पढाउने काम गरेको थियो । मिस टिन क्विनको विजेता बनेपछि अधिकारीले आफ्ना अनुभूति, संघर्ष र भावी जीवनका सपनाहरु यसरी साटिन् ।

तपाईंलाई मिस टिन क्विन २०२१ को विजेता बन्छु भन्ने लागेको थियो ?

मैले यस्तो प्रतियोगितामा पहिलो पटक भाग लिएकी हुँ । आयोजकले अडिसन लिनु भयो । सक्छु भन्ने म मा आत्मविश्वास पलायो । मनमा आशा त थियो । त्यो सँगै अलि डर पनि थियो । तालिममा अरु प्रतिस्पर्धीहरू पनि तगडा थिए । मैले नै जित्छु कि भन्नेमा चाहिँ ५० प्रतिशत लागेको थियो ।

स्कुल पढ्दा के कुरामा बढी रहर लाग्थ्यो ?

मलाई पहिलेदेखि मोडलिङ, डान्स, सामाजिक काममा रुचि लाग्थ्यो । खानाका परिकारहरू बनाउन मन पथ्र्यो । म बच्चाहरुसँग खेल्न, अरुलाई खुसी बनाउन रुचाउँछु । नेपालमा कर्णाली क्षेत्र गएर त्यहाँको जन जीवन बुझ्ने, स्थानीय बासिन्दाको रहनसहन बुझ्ने चाहना छ । मलाई पुस्तक पढ्न रुचि लाग्छ ।

कस्ता खालका पुस्तक पढ्न रुचाउनु हुन्छ ?

कोर्ष बाहिरका किताबहरुमा मेरो रुचि छ । प्रेरणादायी र सकारात्मक सन्देश दिने पुस्तक मलाई एकदमै मन पर्छ । यु क्यान विन, खबुज, मलाला जस्ता पुस्तकहरुले मेरो मन छोए । हरिवंंश आचार्यको चिना हराएको मान्छे, कर्ण शाक्यका पुस्तक, अमर न्यौपानेको सेतो धरती र करोडौं कस्तुरी पुस्तक पनि मेरो मन छोए ।

पवित्र समाज सेवा नेपालले तपाईलाई १६ वर्ष संरक्षण दियो । हुर्कायो, बढायो । तपाई यो संस्थासम्म कसरी आइपुग्नु भयो ?

‘तँलाई पुलिसले यहाँ ल्याएको हो’ भन्नु हुन्थ्यो यो संस्थाकी सञ्चालक दिक्षा मामुले । उहाँले नै मलाई हुर्काउने, बढाउने, पढाउने जिम्मेवारी पूरा गर्नु भयो । मैले सुनेअनुसार, मलाई जन्माउनु मामु बित्नु भयो । कहाँ जन्मिए भन्ने मलाई नै थाहा छैन । मेरो मनमा उत्सुकता भने हुन्थ्यो । यसबारेमा बुझ्ने भएपछि म दिक्षा मामुलाई सोध्ने गर्थें ।

अहिले कसरी समय बिताइरहनु भएको छ ?

मेरो कलेज सुरु भइसकेको छ । नियमित कलेज जाने, आउने गर्छु । त्यसबाहेक युट्युबमा मोटिभेश्नल भिडिओहरु, महाभारत, विष्णु पुराण हेर्छु । अंग्रेजी सुधार्नका लागि युट्युव मेरा लागि सहयोगी बनेको छ । यसबाहेक सामाजिक सञ्जालमा पनि समय बिताउँछु । फेसबुकमा न्युज फिड् हेर्ने, मनमा लागेका कुरा लेख्ने, फोटो अपलोड गर्ने गर्छु ।

भावी जीवनको सपना के छ ?

मलाई मोडलिङ क्षेत्रबाटै केही गर्छु भन्ने इच्छा छ । प्लस टु मा साइन्स विषय लिएर अध्ययन गरिरहेकी छु । त्यो सकेपछि पेशागत रुपमा पाइलटको कोर्ष गर्न मन छ । आकाशमा प्लेन उडाउनुको मजा कस्तो होला ? म मनमनै कल्पना गर्छु । पाइलट एउटा सम्मानित र ठूलो पेशा हो भन्ने लाग्छ । यसबारे युट्युबमा भिडिओहरु पनि हेर्छु ।