कात्तिक २६ देखि मङ्सिर १३ गतेसम्म जुत्ताचप्पल मेला हुने, ३० कम्पनीको सहभागिता रहने

  • प्रकाशित मिति : २०७८ कार्तिक २४, बुधबार
  • chhanbin.com

यही कात्तिक २६ देखि मङ्सिर १३ गतेसम्म फुटवेयर म्यानुफ्याक्चरर्स एसोसिएशन अफ नेपालले प्रदर्शनीमार्गस्थित भृकुटीमण्डपमा व्यापार मेला आयोजना गर्ने भएको छ । स्वदेशी उत्पादनलाई प्रवद्र्धन, विकास तथा विस्तार गर्ने उद्देश्यले मेला गर्न लागिएको हो ।

मेलाका संयोजक होमनाथ उपाध्यायले विभिन्न ३० वटा जुता चप्पल कम्पनीका ६० वटाभन्दा बढी विक्री कक्ष राखिने जानकारी दिए । मेला अवधिमा उपभोक्तालाई केही छुट तथा सहुलियत उपलब्ध गराइने जनाइएको छ । करिब १० लाख दर्शकले अवलोकन गर्ने तथा १ लाख ५० हजार जोर जुत्ताचप्पलको कारोबार हुने अनुमान गरिएको छ ।

एसोसिएशनका पूर्वअध्यक्ष रामकृष्ण प्रसाईंले महामारीका कारण अन्तर्राष्ट्रिय बजारबाट सहजरूपमा कच्चापदार्थ आयात हुन नसकेकाले मागअनुसारको उत्पादन तथा विक्री दुवै हुन नसकेको र यस क्षेत्रमा रहेका धेरै कम्पनी तथा उद्यमीलाई असर परेको बताए ।

मुलुकमा अर्थतन्त्रलाई गतिशील बनाउन र व्यावसायिक क्रियाकलापलाई सहज बनाउन आवश्यक नीतिनिर्माण गर्न सरकारलाई एसोसिएशनले आग्रह समेत गरेको छ ।